مفيش فايده!!!

السلام عليكم و رحمة الله...



فية واحد كان موجود عمل ثورة عام 1919 اسمة سعد زغلول

طيب و اية يعني يا عم امباوي ماجيبتش جديد يعني

ماشي يا سيدي انا جاييلك في الكلام اهو

الراجل دة قال عبارة حلوة اوي و عجابني و من يوم ما عرفت العبارةدي و هية مش عاوزة تخرج من دماغي

احنا علي طول بنسمع عبارات كتيرة اوي و حلوة اوي و كلنا بنرددها و عارفين مين اللي قال العبارة الفولانية و امتي قالها و قالها لمين و كدة

يعني علي سبيل المثال لولم اكن مصريا وغيرة و غيرة .....

انا معاك ان زمان كان فية سعد زغلول ... صاحب العبارة اللي انا بتكلم فيها

انما دلوقتي فية سعد الصغير صاحب عبارات و جمل كتيرة جداا ومنها العنب و خلافه

ويكفينا فخرا انة اول من يغني للحمار و الحيوناات عموما ...!!!

بس العبارة اللي انا بقول عليها بتقول (مفيش فايده)

انا لما عرفت العبارة دي فكرت ان الراجل دة قال العبارة دي في موقف مضحك و لا حاجة ,,, انما عرفت بعدها فعلا ان (مفيش فايده)
بجد (مفيش فايده),,,
كل حاجة معدش فيها فايدة

استنى يا عم امباوي .... انت بتقول (مفيش فايده)... امال فايدة البنوك راحت فين..؟

..ههههه لالا انا مالي و مال البنوك دلوقتي ,,,,وبعدين ما البنوك ...الحمد لله اصحاب النصيب قاموا بالواجب و زيادة وانت عارف الباقي (قروض و اختلاسات و غيرة )

لالا انا اقصد الناس بذاتهم ..

بص يا سيدي

زمان لما كنا بناخد تاريخ و جغرفيا و كدة

درسنا شخصية مصرية اسمها سعد زغلول ... و علي ما انا فاكر و علي حد علمي ان الراجل دة كان ايامة انجليز يعني استعمار .... يعني احتلال ,, يعني اللي ا انت عاوز تقولة قولة

بس لما هو حاول انة يخررج الناس دي من البلد .. كان قدامة عوائق و مفيش طبعا مساعدات و لا امكانيات ولا كان فية امم متحدة ولا غيرة

...راح الراجل قايل العبارة دي (مفيش فايده)

انا مش هحكي و اقول علي مناسبة العبارة دي بالتفصيل

انما كل اللي انا عاوزة الجملة نفسها

الراجل دة قال العبارة دي من حوالي كام و تمنين سنة

و دارت و لفت الايام و االعبارة دي ,,,, مفعولها شغاااااااااال و مش بينتهي

الشعب مش بيبطل كلام و لا بيبطل شعارات و (مفيش فايده)

الشعب مغلوب علي امرة و خايف يطالب بحقة ...و (مفيش فايده)

الاسعار نااااااااااااااار و كل يوم فية زيادة فيهاز الزيادة بمقدرا الضعف و(مفيش فايده)

التعليم (مش بالمجان) و بردة(مفيش فايده)

الشباب الجامعي طلع عينة دراسة و مزاكرة و امتحانات و مفيش وظائف و(مفيش فايده)

طابور المعاشات طولة 20 متر ..... و الموظف مطلع عنين الناس و(مفيش فايده)

الناس تموت في حادثة العبارة و المسؤلين يهربو و محدش يحكامهم و(مفيش فايده)

الحديد يتصدر برة برخص التراب ..و هنا يتباع باعلي الاسعار و كل يوم يزيد سعرة زيادة لا تطاق ...و بردة (مفيش فايده)

طابور العيش ... العيش ....اللي طبعا مش عاوز اتكلم عنة ... علشان اعصابي مش مستحملة و(مفيش فايده)

االمستشفيات اللي مفروض انها مكان بيتعالج فية المرضي لا تصلح للحيوانات انهم يتعالجو فيها !!.....و كل يوم نشوف وزير الصحة بيتكلم و يقول ان الحمد لله المستشفيات مجهزة باحدث الاجهزة الطبية و ...و....و(مفيش فايده)

و المعارضة ياعيني مش بتسكت ولا بتكل و لا بتمل و بردة (مفيش فايده)
و اللي يقول الحق يروح في ابو نكلة و (مفيش فايده)

و لا اللي بياكل عاوز يشبع ...و عمره ما هيشبع ....و بردة (مفيش فايده)فيهم

طبعا حاجات كتيييييييييييير جداااااااااااااا فوق الحصر مفيش فايدة فيها


طيب لية مفيش فايدة ...؟؟ لية اللي بيحصل دة كلة ؟ و علشاان اية؟؟

ولا هوة فعلا (مفيش فايده)....!!!!!!

تحياتي لكم